لماذا تتصرفن هكذا ؟؟؟

البنات ألطف الكائنات ، ولكن تجد بعضهن وليس جميعهن عندما تتقرب إليهن ، يدور فى رأسك العديد من علامات الأستفهام ، وعندما تنظر إلى تصرفات كل واحدة يصبحنا من وجهة نظرك أغرب الكائنات ، وكذلك الأولاد، ولكن علامات الأستفهام التى تدور حول تصرفات الأولاد مختلفة تماما عن علامات الأستفهام التى تدور حول تصرفات البنات .

دعونى أحكى لكم بعض من هذه التصرفات التى رأيتها امام عينى ، وسمعت عنها.

آخر يوم فى الأمتحانات كلنا انا وصحباتى فرحانين بالأجازة، ونريد ان نمضى بعض الوقت سويا ، ونآكل لأننا رايحين الأمتحان من غير آكل وجعانين ، فرحنا مؤمن نآكل ، فواقفين نطلب السندوتشات اللى هنآكلها ، وجدنا بنت تقترب نحونا مسرعة ، وفى يدها تليفونها المحمول، وهو يرن، وقالت لنا لو سمحتوا هو غداء يعنى ايه ، بس احنا فى الحقيقة ما سمعنهاش كدا، لأنها كانت بتتكلم بسرعة ، فسمعنها أنتى غادة، قولتلها لأ أنا مش غادة ، فقالتلى لأ قصدى غداء يعنى ايه بالأنجلش ، وكل هذا الوقت والتليفون مازال يرن ، فقولنلها ، فأبتعدت قليلا وأتكلمت فى التليفون ، وكل ده تخيلوا عشان تقول للى كان بيرن عليها انها بتآكل وجبة الغداء بتاعتها فى مؤمن بس بالأنجلش ، طب لما أنتى مش عارفة أنجليزى ولا عارفة غداء يعنى ايه بالأنجلش، ليه بتتعبى نفسك، وبتحرجيها معاكى ، ما تقولى بتتغدى فى مطعم بالعربى كدا، وخلى البساط أحمدى ،بالذمة هو فى أغرب من كدا .

نيجى بقا للإيميلات ، هى حلوة الحقيقة ،وبتقرب الناس من بعض، ووسيلة أتصال هايلة خصوصا لما يكون ليكوا حد مسافر فى الخارج،بس فى ناس كتير الحقيقة بتستخدمه استخدام سىء، على سبيل المثال غرف الشات دى الحقيقة لسه سامعة عنها قريب من اتنين صحباتى كنت بكلمهم على الميل ، فبأسألهم أنتوا بتعملوا ايه ، قالولى احنا داخلين على موقع وبنعمل شات، قولتلهم ازاى يعنى مش فاهمة ، فقالولى ما تدخلى معانا قولتلهم لأ ما ليش فى الكلام ده ، فبقولهم هو عبارة عن ايه ، قالولى ابدا بندخل ،وبنكلم اى حد بنتسلى يعنى، وبنعمل شوية أشتغالات كدا، شفتوا الكارثة ، يدخلوا ويكدبوا وطبعا مش بيقولوا على اسمهم الحقيقى ، سواء البنت او الولد كلهم بيشتغلوا بعض ، طب وليه كل ده هو انتوا ناقصين ذنوب ، طب ولاد بالنسبة للمجتمع والأهل عادى دول ولاد مع ان الكلام ده مش موافقة عليه ،أنما بنات وغرف الشات طب كلامى للبنات هنا انتوا بتستفيدوا ايه من كدا ، ان واحد يقولك كلمة حلوة او يقولك قد ايه انتى دمك خفيف، وروشة طحن ، ليه يابنات تعملوا كدا ، طيب تخيلى أنتى لما تتتجوزى ،وربنا يرزقك بأطفال هتربيهم أزاى، وتقوليلهم ما تكدبوش أصل الكدب حرام، وانتى ياماااا كدبتى فى حياتك،واللى بيكدب مرة بيكدب ثانى وثالث،وحياته كلها كدب فى كدب، لأ والأنيل من كدا، زى ما انتى كنت بتعملى وانت صغيرة هيعملوا زيك بالظبط، ويدخلوا برضه غرف الشات، والأولاد يشتغلوهم، ساعتها كأم هترضى انهم يقعدوا، ويعملوا كدا، وانتى عارفة ان ده غلط ،واكيد اتقرصتى من غرف الشات دى، وعارفة ان كله نصب فى نصب ، لازم يا بنات تحطوا قدام عينيكوا حاجة مهمة اوى أنكوا اى حاجة تعملوها غلط فى حياتكوا ، ربنا هيقعدها فى أولادكوا، سواء بالخير او بالشر، ودى حقيقة لازم ما نغفلهاش ابدا، فربنا يهديكوا يابنات، ويا أولاد برضه ما تفتكروش ان اللى بتعملوا ده صح، وانك ولد ما فيش عليك حرج ، لأ ربنا بيحاسب الكل سواسية .

نشوف بقا الحجاب الموضة، البنات دايما بيجروا ورا الموضة ، ويقلدوها ، بس ما هو مش كل حاجة موضة نجرى وراها وخلاص عشان ما هى موضة ، لازم كل بنت تشوف ايه اللى يناسبها، ويناسب مجتمعها ،ويناسب البيئة اللى أتربت فيها،وتراعى ربنا فى لبسها برضه ، عشان يوم الحساب ، يعنى من أغرب الحاجات اللى بشوفها أنك تلاقى بنت محجبة زى ما بيقولوا على نفسهم ، ولفة الإيشاب عادى وكل حاجة ، بس تبص تلاقيها لابسة الجيبة تحت الركبة ، وياريت لابسة بوط ، لأ دى مش لابسة حاجة خالص ورجلها باينة ، طب لازمته ايه الإيشارب اللى انتى لابسه ده ، ما تقلعيه أحسن، ولا اللى بيلبسوا البنطلون الجينز الماسك جدا ، وياريت بيلبسوا عليه حاجة طويلة لأ ده بيلبسوا عليه بادى، هو ده بقا الحجاب من وجهة نظركم ، حرام عليكم تسيئوا ليه بالشكل ده ، ربنا يهديكم ويهدينى، آمين .

طبعا المتوقع من البنات اللى هتقرأ الكلام ده هيقولوا هى مين دى وهى فاكرة نفسها ايه، وفكرنا ايه، بس انا بقول رأى فى البنات اللى بتعمل كل ده ، والحمد لله انا محجبة وبلف الإيشاب عادى جدا زى زيكوا ، وبلبس على الموضة برضه بس اللبس اللى يناسبنى، ويناسب البيئة اللى أتربيت فيها ، لكن عمرى ما لبست جيب قصير، ورجلى باينة، ولا بنطلون جينز ضيق، ولا دخلت غرف شات ، ولما بكلم أى حد بكلم عادى جدا الكلام العربى بتاعنا ده، ومش برفع صوتى لما أرد على التليفون ، يعنى بطبعتى ، فلأنى كدا بستغرب على اللى بتصرفوا التصرفات اللى سبق وقولتها ، ونفسى أسألهم سؤال واحد انتوا ليه بتعملوا كدا ، لو فاكرين ان بكدا هتعجبوا الأولاد، وتلفتوا انتباهم ، أنتوا اى نعم هتلفتوا انتباه الأولاد ، لكن مش كل الأولاد، وبعدين ليه تشيلى ذنوب على اللبس، وكمان على نظرة الأولاد ليكى.

" يارب أهديكوا واهدينى واهدى جميع المسلمين "