رسمى

أنا بجد مش عارفة انا أزاى رسمت الرسومات دى ، وبعد ما رسمتهم أنا مستغربة أزاى انا مسكت القلم ورسمت كدا ، هو فى الحقيقة أنا أكتشفت موهبة الرسم، وأنا فى الأعدادى ، هأقولكم أزاى ، أنا بحب أوى أشترى الكشاكيل اللى عليها رسومات كرتون ، ففى يوم كان قدامى الكشكول، وأنا بذاكر وقعدت أبص للرسمة اللى عليه، وهى كانت صورة تويتى ، فمسكت القلم الرصاص ، وقعدت أبص للرسمة كويس أوى ، وأرسم فى ورقة خارجية ، وأبص على كل خط فيها وأشوف طوله وأخره لحد فين عشان أرسم زيه بالظبط لحد ما أنتهيت من رسمها ، وأكتشفت أنى رسمت رسمة مش هأقولكم زيها بالظبط لكن قريبة منها ، فعجبنى الموضوع ده وقعدت أرسم كل الأشكال اللى على الكشاكيل بتاعتى ، فلاقيت أهلى وصحباتى عجبهم رسمى، وبيقولولى أنتى رسمتى الحاجات دى أزاى ، دى حلوة أوى ، قلتلهم عادى ، لدرجة أنهم كانوا بيشكوا أن ده مش رسمى، وبيقولولى أنى شفاها، لأنهم ما كانوش يعرفوا أنى بعرف أرسم زى ما أنا ما كنتش عارفة ، لحد ما فى يوم قعدت أرسم رسمة قدمهم ، فمن ساعتها وهما ما عدوش يشككوا تانى فى رسمى ، فأنا حبيت أعرض لكم الرسومات دى عشان تقولولى رأيكم .

" عرض الرسومات "

" تويتى الحبيب "

" تويتى الفنان "

" تويتى الجاسوس "

" ميكى "

الحقيقة الصورة دى طابع عليها أزرق من الصورة التانية اللى فى ضهرها ،ولو لاحظتم هتلاقوها عيون تويتى الزرقة، لأنى كنت برسم فى الوش والضهر، والألوان طبعت .

" الدبدوب والفار السندق "

على فكرة الصورة دى كل شكل فيها كان لوحده على كشاكيل مختلفة ، لكن أنا جمعتهم مع بعض فى رسمة واحدة .

" الأصحاب واللمة "

على فكرة الرسمة دى أصعب رسمة رسمتها ، وأخدت منى وقت كتيررررررر عشان تتظبط ، وكل شوية كنت برسم وأمسح ، أرسم وأمسح عشان أطلعها بالشكل ده ، وهى دى الرسمة اللى رسمتها قدام أهلى فى البيت ، عشان أثبت لهم أنى مش بشف الرسومات ، عشان كدا انا بحبها أوى .

" الأرنب الروش "

" الرسومات اللى جاية دى بقا ايه نكتة وحكاية "

" الرسمة الأولى "

الرسمة دى فى الحقيقة قعدوا فى البيت يقولولى أنتى هتفضلى ترسمى رسومات كرتون كدا أرسمى حاجة تانية ، فأختى الصغيرة دينا قالتلى ارسمينى يا صفا، وقعدت تلح عليا، قلتلها مش هأعرف، قالتلى بس أرسمينى كدا ، بس بعد ما رسمتها ، أكتشفت أن الرسمة طلعت حد تانى خالص، مش دينا أختى ، واللى شاف دينا هيقول شتان الفارق بين الرسمة والحقيقة .

" الرسمة الثانية "

الرسمة دى بقا كانت بوستر لنرمين الفقى فى مجلة، وعجبنى أوى، فقررت انى أجرب كدا وارسمها، وطبعا كالعادة ما فيش مقارنة خالص بين دى ، ونرمين الفقى .

" الرسمة الثالثة "

فى الحقيقة قررت أنى ما أستسلمش وأقرر المحاولات، فكان فى مجلة برضه فيها بوستر لأليسا فقلت بس هى دى، ومسكت القلم الرصاص، ورسمت، وكالعادة لاقيت حد تانى خالص غير اليسا ، بس يلا أدينا بنحاول، وبنتسلى برضه .

" الرسمة الرابعة "

الرسمة دى بجد بحبها جدا جدا ، لأنها أحسن رسمة ليا بعد المحاولات الكتير دى ، ولأنى أستفدت من أخطائى فى الرسومات اللى فاتت ، على الرغم أنها برضه ما طلعتش اللى كنت برسمها ، لأنى كنت برسم روبى من مجلة ، فطلعت واحدة تانية خالص، وكمان أحلى من روبى بكتيررررر ، عشان كدا أنا مبسوطة ، وما حبتش ألونها، لأنى لو لونتها كانت هتبوظ منى زى التانيين، فلاقيتها كدا أحلى من غير ألوان، بس اللى مضايقنى أنى وأنا بعملها على الأسكنر، ما كانتش واضحة أوى عشان ما هى برصاص، فحبيت أبين خط الرقبة، وماكنتش لاقية قلم رصاص، فبينته بقلم أسمر، فأنا حاسة أن الخط باين أوى فى الرسمة، لو كنت عملته برصاص كانت هتفرق، بس يلا الحمد لله، لسه حلوة فى نظرى برضه.

ودى أخر رسمة رسمتها، وعلى فكرة الرسومات أنا حطاها بالتسلسل، من أول رسم رسمتها لأخر رسمة، وأنا عارفة أن ده أى كلام يعنى لا رسم ولا حاجة ، وأنا فى الحقيقة ما كنتش ناوية أنزله ، بس واحدة صحبتى عزيزة عليا أوى أسمها رنا ، قالتلى نزليه ، وأنا كنت محتارة ومش عاوزة أنزله ، بس أعمل ايه ما أقدرش أرفض لها طلب ، وياريت تكوت أنبسطت كدا لما نزلت الرسومات الهابلة دى .

" فيديو بالرسومات "

على فكرة الفيديو بتاع الرسومات ده رنا صحبتى هى اللى عملهولى ، وأنا الحقيقة بأشكرها عليه جدا ، وبقولها ربنا يخليكى ليا ولأهلك ولابن الحلال أن شاء الله ، مرسى يا رنا .